চাঙমার আদি কবি শিবচরণ আা তার গোঝেন লামা

কবি শিবচরণে কাপ্তে চাগালান্দি নাড়েই মুড়োর এক্খান আদামত জনম লোইয়ে ভিলি শুনা যায়। তা বাব’ নাঙান ধুংগিরি আ মা’বো নাঙান অহ্‌লদে ধর্ম্মবী। চিগোন কালত্তুন ধরি কবি শিবচরণে নানান কিঝুলোই ভাবি ভাবি থেদ। তা চিগোন কালর কধা সেধক জানি পারা নহ্‌ যায়। হালিক এক্কা উজুলো অহ্‌নার পরে কবি শিবচরণে চাদিগাঙর দগিণে তৈমুর ছড়া কুরে-কারে তা দিনুন কাদেয়্যে ভিলি হবর পা যায়। গাবুজ্জ্যে কালত তে “গোঝেন’-লামা”বো রোজেয়্যা ভিলি মনে গরন। গোজেন’ লামাবো রজানার কাল এগার আঝাঢ় চুরাশি সন (১১ আষাঢ় ৮৪ সাল) দে আঘে। হালিক সে সাল্ল্য বাংলা না মঘী সাল সিয়ান গমে উধিচ্ পা ন যায়। সক্ক্যে দিনোত চাংমা সমাজত কবি শিবচরণর সাধক ইজেবে ভারি নাম এলহ্‌। তার সাধনা বিদ্যে নিনেই চাংমা সমাজত নানাক্খান কধা চলি এযের। শুনা যায়দে, তে ভিলে কাজাবাদে যক্কেপায় লুক্ দি পাত্ত। নানান জনে কন্দে তে ভিলে গাবুজ্জ্যে কালত পিত্থিমিত্তুন এক্কুয়ারে লুক্ দিনেই তে আর সমাজত ফিরি ন এযে। তা সমারে চীদঙ্ নাঙে তার এক্ক্য শিষ্য তা সমারে পিত্থিমিত্তুন লুক্ দিবার কাদাল্যে তাল্লোই সল্লা গরি আদ্ধানত্তুন ফিরি এযানায় তে গাই গাই লুক্ দিয়্যে। সিত্তুন ধরি তারে আর সমাজত দেঘা ন যায়।

পরেন্দি তা শিষ্য চীদঙে আ তা সমারউন মিলিনেই এ “গোজেন’-লামা”বো সমাজত মুয়্যে মুয়্যে ছিধে দিয়োন। কবি শিবচরণরে চাংমা সমাজত এবসং মনত রাঘেয়্যন। মনত্ রাঘেয়্যন তা সাধনা বিদ্যের কধানি। মনত রাঘেয়োন তা রোজেয়্যে সে গোজেন লামা’বো। ইধোত তুলি মান্যে এবসং গেই উধোন…
যে বর মাঘে সে বর পায়
গোঝেনে বর দিলে ন ফুরায়।

গোঝেন’ লামা

।। এক লামা ।।
উজানি ছরা লামোনী যার-
ন’ উদে সৃত্তি জলত্‌কার।
জল উগুরে বচ্যেহ্‌ থল্‌,
বানেল গোজেনে জীব’ সগল
আরেয়ে মানেয়ে যার জনম,
আগে সালাম দ্যং তার চরন।
চানে সূর্য্যে সদর ভেই
সালাম দ্যং মুই ভূমিত্‌ থেই।
সম্মুগে সালাম দ্যং পুগেদি;
পজিমে সালাম দ্যং পিজেদি.
উত্তরে সালাম দ্যং বাঙেদি;
দঘিনে সালাম দ্যং দেনেদি,
মরেহ্‌ বিধির দয়া হোক
তিন দেব’ চরনত্‌ সালাম থোক।
ন’ ভুঝে তিন দেবে সেই সগল
বর্‌ কমল আর’ ফুল কমল,
মা স্বরস্বতী সালামত-
যোগেই দিদগোই গীদ পধ।
সালাম মানেই তপজী
ধর্মশীলা সন্ন্যাসী,
এগামনে ভুজঙর
সালাম জানেলুং দেব সগল।
পুজর গুরু মানেলুং
আহ্‌জার সালাম জানেলুং।
মর্ত্য-পুরীত জনম যার,
তার চরনে নমস্কার।
দশ মাস দশ দিন দুখ পেইয়ে
জোম্বু দ্বীবত্‌ জন্মেইয়ে।
পুরেই চেলুং চোখ ভরি।
মা- বাব’ পারা নেই দেশ‌ ভরি।
পোর্বুয়া বুঝে ইঙিদে-আগারে
এযের মানেই লুক্‌ সংসারে।
মা-বাব’ চরন ভুজিলে
সগল তিত্থ ফল পায় ভিলে।
জ্ঞানী ধ্যানী সালাম দ্যং-
পোর্বুয়া পোন্দিক ভুজিলং।
বেগরে সালাম মুই দিলুং,
গীদ’ সাধনান সাধিলুং।
গীদ’ একমালা ফুরেইয়ে,
বুঝিলে বুঝিব মানেইয়ে।

।। দ্বি-লামা ।।

তদাত্‌ বেরেই ধুব কাবড়,
গোজেন’ চরনত্‌ ভজঙর;
আগে সালাম দ্যং শিবচরন,
মাগং গোজেনর দুই চরন।
ছাবাত্‌ তলে রাগেদ;
একালে-উকালে তোরেদ;
জন্মে জন্মে দেগা ওহ্‌ক
চিদে মনে এগা ওহ্‌ক !
দেবংশি গোজেনে ন’ দুঝি,
অবুঝ মানেইয়ে ন’ বুঝি।
শুনো, শুনো, পোর্বুয়া ভেই-
দ্বিবে অক্‌খরে তোরি যেই।
গুরু সাধি নাং পেইয়ে,
অনা গুরু পার ওহ্‌ইয়ে।
সাধি আনং আর জনম্‌
সগল দান গরঙর এই জনম
জুরি ন’পাল্যে কুধু পেবে ’
ভুজিলে চরনে কুল পেবে।
ন’ রলে ধন’ মান সাধনে-
থরিব মানেইলোক্‌ ফুলদানে।
গুরু চরন সার গরে;
বংশ ধনে কি পার গরে?
এগামনে ভুজিলে
সগল তিত্থ ফল পায় ভিলে।
দয়া দেলে সার গরে,
অপার পানি সাগরে-
তিরিচ্‌ তিন জাদিভাচ্‌ পাত্তুংগৈ মুই অহ্‌রগে।
ভুজিলে মানেইলোক্‌ এই কালে,
যমে ন’ ধরিব ওই কালে;
যে বর্‌ মাগে মাগে সে বর পায়
গোজেনে বর্‌ দিলে ন’ ফুরয়।
গোজেন মেইয়া উদ’ নেই
পরম বৃক্ষ ভর্‌ দিয়া
বুঝি পারে কন্না তার মেইয়া?
সগল জীবে বিদায় ওহ্‌ক
চিত্ত মনে এগা ওহ্‌ক।
পরম গোজেনে কুধু থায়?
সাতবার সাধিলে-য় চেই ন’ পায়।
তদা সাধি আনিব
পরম গোজেনে ভুঝিব।
চরনে সালাঙে ভুঝিলে,
ধর্ম সাধনান পায় ভিলে।
সালাম দিবের কাজেল’
গীদ’ দ্বিলামা ফুরেল’।
গীদ দ্বিলামা ফুরেলও ন’ যেবং
গোজেন’ সুম্মুগে বর্‌ লবং।

।। তিন লামা ।।

তদাত্‌ বেরেই কাবরে-
আরাধনা গরঙর আহ্‌ধ জুরে।
দুখ্যা কূলে ন যেদুং
সুখ্যা কুলে মুই এদুং,
আহধে ন’ গোত্তুং জীব বধ
যুগে যুগে ন’ পর্ত্তুং দোজগত্‌
পরম বৃক্ষ মরন অধ’
চিদা চর্জ্জা ন’ থেদ;
কধা ন’ অহ্‌ধ তলেদি
লোগে ন’ গত্তাক কলংগী।
রোগে ব্যাধিয়ে ন’ ধত্ত
অজল নীজ, দাত ন’ অধ’
পরা ন’ পেদুং ধনেদি
উনো ন’ উহ্‌দুং জনেদি;
অবুঝ জন্ম ন অহ্‌ধুং
তিদে কধা ন’ শুন্দুং।
কানে ন’ শুন্দুং কু-কধা,
পরে ন’ কধ অগধা;
পর্বুয়া পন্ডিক যেই দেঝে-
জন্ম অহ্‌ধুংগৈ সেই দেঝে
অ-রানী-রাজার দেচ্‌ লাক্‌ ন’ পেদুং
অ-ঘাদে অ-পধে যেই ন’ পেদুং।
যেধক্‌ চিদে থায় ন’ জান্দুং;
বেধক্‌ পরা-ধরা ন’ পেদুং।
গীদ’ তিন লামা ফুরেলুং,
সভার বেক্কুনরে সালাম জানেলুং।

।। চের লামা ।।

তদাত্‌ বেরেই কাবড়ান,
ভুজিলুং গোজেনর চরনান।
গীদে রেঙে উল্লাঝে-
সাধঙর সাধনান কেলাঝে?
দুখ্যা জন্ম ন’ অহ্‌ধুঙগৈ।
বাবে এধ গম্‌ দিনে
জন্ম দিদ সুহেনে।
সাধি ঘরত্‌ আবুচ্‌তুং,
মন’ কেলাজে হেলেদুং।
জাদে কুলে অহ্‌ধুংগৈ।
চানে শিক্ষায় অহ্‌ধুংগৈ।
ধার্ম্মীক মা-বাপ লাক্‌ পেদুং;
চিদে শূন্য মন’ সুঘে দুধ খেদুং;
সাত ভেই, সাত বোন লাক্‌ পেদুং,
ননেয়া গুরোবুয়া মুই অহ্‌ধুং।
সোনার ধুলোনত্ ধুলেদাক;
দেবর ভঙানি ভঙেদাক
জেত্‌ঠা সমারে জেদেঙা,
হুরো সমারে হুরঙা।
কালি কুচ্যালে দুবো ওহ্‌ক।
গুত্তি গুদুরি ধেইল বারোক্‌।
ধনে জনে অধ’ মর;
ধানে ভরন গলাঘর।
সং সমাজ্যো পাং পারা;
লোক কুদুমে সব্‌ পুরা;
কধানি অহ্‌ধ’ মু মিধা
গীদে রেঙে গম গলা।
মাধা জগা চুল ধরোক।
মধুর অধ’ দ্বিবে চোখ
বেঙা অধ’ চোখঅ ভং,
মুজুঙ’ দাত্তুন অহ্‌ধ সং।
চেবার গম অহ্‌ধ উত্তানি
বানেদ’ গোজেনে আহ্‌ত্তানি।
তদা পেদুং দেব’ গরন,
বারাহ্ অঝার বুক ভরন।
ছানে চিক্যায় গরনে-
রূপে রঙে পেদুং সপ্পানে।
রাজা-বাদাত্‌ পান খেদুং,
গুরু সাধি নাং পেদুং
সাদি ঘরত্‌ আবুচ্‌তুং,
পোর্বুয়া পোন্ডিক মুই অহ্‌ধুং
দোজ্যা কোরোলি পায় গুন্দুং
আগাজ চান-তারা আহ্‌ধে গুন্দুং
লোকে আহ্‌ঝিয়ে মাদেদাক্‌
সর্বলোকে পুজিদাক
দেলে শত্তুরে বুঝিদাক।
আহ্‌ধে পেদুং লোগ বর,
কেইয়্যাত পেদুং রূব বর।
গীদে চেইর লামা ফুরেই যার
তদা সাধঙর আরক বার।

।। পাঁচ লামা ।।

তদাত্‌ বেরেই কাবরান,
ভুজিলুং গোজেনর চরনান।
চরনে সালামে ভুজিলে-
সগল তিত্থ ফল পায় ভিলে।
পাচ্‌ ফুল দানর ফল পেদুংগোই,
রধে-বলে মুই অহ্‌ধুংগৈ।
গোজেন’ সুম্মুগে কর্‌ পাদং
সাতপুত চেই যদি বর্‌ মাগং,
দেনে মাগং ধন’ বর্‌
বাঙে মাগং জন’ বর-
ধনে সম্পদে সব পুরা
জুরি পার্ত্তুংগৈ এ্যাইত্-ঘোড়া
যে বর মাগঙর মনর সাধ
সে বর পেদুংগৈ আহ্‌ধে আহ্‌ধ।
আহ্‌ল্যা আবুজিলে লেই সাধি;
জুম্মুয়া আবুজিলে তং সাধি;
দেবান আবুজিলে বীর সাধি
রাজা আবুজিলে চক্রবত্তি সাধি
কেইয়াত পেদুং সাজানা-
তিরিচ্‌ তিন জাদত্তুন পেদুংগোই আহ্‌জানা।
খাদে পালঙে ব’ খেদং
তিরিচ্‌ তিন জাদি ভাচ্‌ মুই পার্ত্তুং।
যে বর মাগঙর মনর সাধ,
সে বর পেদুং আহ্‌ধে আহ্‌ধ।
গীদ পাচ লামা ফুরেই যার
তদা সাধঙর আরক বার।

।। ছ-লামা ।।

তদাত বেরেই কাবরে
আরাধনা গরঙর আহ্‌ধ জুরে
মা-বাবর ভক্তি লং,
সাত ভেই সাত বোন বর্‌ মাগং।
আহ্‌ধে ঢালি পানিয়ে
এগার’ আঝাঢ় চুরাশি সন
ফলানা বারে সাধঙর এগামন
আহ্‌ধে ঢালি পানিয়ে-
দিব’ মা সরস্বর্তী সাক্ষীয়ে।
চরনে সালামে ভজঙর
যেবার মেলানি মেলঙর-
গীদে ছ-লামা ফুরেইয়ে-
বুঝিলে বুঝিব’ মানেইয়ে।
দেবর কুলে দেব মানায়
মানেই কুলে লোক মানায়।
কুধূ গেলা সংগী ভেই?
সাধি সমারে চলি যেই,
কুরেইয়ে ছ-লামা ফুরেল-
গোজেন’ চরনে মন্‌ রল’।

।। সাত-লামা ।।

সাত লামা রজাঙর গোজেন কৃপায়,
শত্তুর ওই লোকে মুক্ত তপ্ত পায়।
জরেলুং মুই গোজন সাত লামা
ন গচ্য বাপ-ভেই সকল মন কালা।
সাত লামা জরেই বিদায় অহ্‌ঙ্,
মা-বাবত্তুন বিদায় লং।
সাতনাল সুদো ছিনি যাং
জর্মবুদি কুদুম লক
মুই ন’ এইম আর।
গীদ’ সাত লাম পুরা ওহ্‌ল
জর্‌মবুদি বিদায় ওহ্‌ল।
গোজেন চিন্নরে গুরু কোই
মাধা পানি ভক্তি লৈ।
বঝর’ শেজত এক্কুয়া দিন,
গেবং সালামি সাত লামা চিরদিন।।

-: থুম :-